最近喺網上瘋狂洗版嘅紅色波波球掃帚草真係好吸睛!靚到好想立即飛去日本睇!原來佢地係位於日立海濱公園,而且呢到一年四季都有花睇,就算依家趕唔切睇掃帚草,遲下又有不一樣嘅花海睇!

日立海濱公園位於茨城縣常陸中市,由東京出發只需兩個鐘車程!呢到一年四季都有花睇!

除左有掃帚草,仲有著名嘅藍色花海「粉蝶花」、由綠色變成紅色嘅「掃帚草」、色彩繽紛嘅鬱金香同粉紅波斯菊等,所以一年四季都吸引好多當地人同遊客一睹花海!

公園佔地350公頃,有成5個東京迪士尼樂園咁大,要行足一日先行得晒!公園主要分為花園區、樹林區同遊樂園區!遊客可以選擇步行、踩單車或者坐遊園車環遊觀賞園内迷人景色

一入到公園,大家都向住同一個方向狂奔!原來係想第一時間去花園區到睇當季嘅花園區!

 

園方種植左接近38種唔同類型嘅花卉,所以日立海濱公園一年四季都有截然不同嘅花景!全年都展現出各具特色嘅氛圍,而且不可思議嘅大自然絢麗景色

夏天花園區種滿藍色花海粉蝶花,依家秋天就係睇掃帚草!

而大家最期待嘅掃帚草就喺見晴之丘!

3萬幾棵圓碌碌嘅掃帚草由每年7月開始都會佔領整個山丘,一遍綠油油,遠睇就好似一大堆綠色波波球,好得意啊!

造型超可愛嘅波波球仲有成半個人咁高,喺到玩捉迷藏都完全冇問題!

唔講你唔知,原來掃帚草嘅花語係解「夫婦圓滿」,難怪會咁圓碌碌啦!

一到秋天,一大遍掃帚草就會由紅變綠,組成秋天獨有嘅天然紅地氈!

成熟左嘅掃帚草仲可以用作中藥材同掃帚,真係好睇又多用途!

秋天嘅國立海濱公園除左有掃帚草之外,仲有過百萬棵粉紅波斯菊映入眼簾,各種顏色形成柔色漸變層,好療癒啊!真係要喺到瘋狂影番十張八張相先得!

賞完花可以去娛樂園區都玩下又或者望住咁靚嘅花海景色野餐,真係胃口都特別好!

娛樂園區內有機動遊戲、BMX專用區、Café、大草原同野餐廣場等等,為遊客提供多元化嘅遊樂設施

又有花睇又有得玩,一年四季都好值得專程坐車去!