[捷克景點] 童話世界 庫倫洛夫Český Krumlov CK小鎮一日遊

捷克的Český Krumlov,簡稱CK小鎮,是個童話到極致的小鎮,從高塔上看到一整片的橙色屋仔,還有城堡,景色超美,去捷克必遊!CK已經有超過700年歷史,於1992年被列為世界文化遺產,整個小鎮保持了中世紀的面貌,古典又精緻,少女大愛!由布拉格出發,大約要3個鐘的車程,今次我就參加了 travelwebsite.com 的一日團,一黎唔想諗交通安排,二黎想有導遊講解下d古蹟歷史。而我出發個日個團竟然得我一個人參加……所以我變左超級VIP,導遊全程淨係招呼我一個,私人導遊呀,我是個尊貴的少女哈哈哈。

CK小鎮有迷你版布拉格之稱,都真係幾似,如果你鍾意布拉格,都一定鍾意CK。一日團由市中心的酒店接送開始,2個半鐘多d就到CK。到左就會食lunch先,團費包左,餐廳Pivovar Eggenberg有超過400年歷史的,裝修好古老好傳統,可以自己揀食咩,我個餐有個雞湯、捷克傳統食物svickova同捷克黑啤,係牛腩再加麵包餃子,個汁好好味。

之後就係大約一個鐘的walking tour,導遊帶我行左一圈成個小鎮,一邊講解唔同建築物的歷史故事,我覺得佢講得幾好,唔會講到太複雜同太悶,深入程度剛剛好。之後就會係自由時間,可以自己隨意逛,我自己又重新行左一圈,而家就到我做大家導遊啦。哈哈。

遊CK的路線通常由城堡開始,第一廣場就當佢係入口啦,城堡的護城河有兩隻熊……係真的熊。呢度仲有旅遊服務中心。CK的城堡由40幢建築組合而成,係捷克第二大,最大係布拉格城堡。

睇完熊就到達第二廣場。重點是CK的地標彩繪圓塔,一定要上去,個塔本身都好彩色好靚,雖然要行147級樓梯,但上到去見到個景係完全值回票價同腳骨力。門票$50KC,約港幣$17,好平,但要注意唔係全年都開放。上到頂就可以300度睇曬成個CK的景色,點解係300度呢,因為有一小部份block左行唔到,但其實都叫睇到,唔大分別。在塔頂將CK的童話風光盡收眼底,除左好多哥德式及巴洛克風格的建築外,仲有伏爾塔瓦河(Vltava),河水又清到有建築物倒影,真係好靚好靚,呢個全歐洲保存最完整的中世紀建築群真係名不虛傳。

彩繪圓塔仲有個博物館,要另外買門票。落返地就可以去逛城堡其他部份,,從高空睇成座城堡都幾壯觀,但我去個日城堡並沒有開放,佢開放日期由每年4月1到10月31日(個別日子唔開),我3月尾去,入唔到入面,但出面經過個陣導遊都有逐個部份同我介紹,包括有禮拜堂、房間、宴會廳等等,城堡開放的日子呢個團會包入場門票。呢度有第二、三、四廣場,每個廣場的牆身都有文藝復興的畫,真係畫上去的,好有古典味。

由第四廣場行去第五廣場中間有條橋廊,係石橋黎,都係個非常唔錯的睇景位,而第五廣場就會有歌劇院。最後仲有個城堡花園,但季節唔岩都冇花睇,導遊話夏天花開得好靚,所以我都想建議大家夏天黎CK。

離開城堡,就開始在頭先見到一群密集的橙色屋頂屋仔之間穿梭,又可以近距離見到伏爾塔瓦河,好多人在河邊的餐廳食野,勁寫意。

歐洲的特色係每座建築物都好似藝術品,即使係普通的屋仔,可能只係餐廳或者商店,但個建築都可以好有特色好靚,間間唔同。某d建築上保留文藝復興式的壁畫,都係手繪的。呢度都好多手工藝店,幾多精品睇。CK小鎮其實唔大,3-4個鐘就會逛完,但個氣氛好寧靜好舒服,你會想一直留低……醒醒啦喂,夠鐘走啦!自由時間完結,會合返導遊,專車就送我返去布拉格的市中心酒店啦。

在布拉格同CK中間會經過另一個叫České Budějovice,簡稱CB的小鎮,導遊都有簡單介紹下,有個四四方方被彩色屋包圍的廣場,都幾得意架,仲有個名為Black Tower的觀景塔,佢仲係百威啤酒的發源地。但比起CK佢實在太卑微了……好多人都只當佢係個轉車站。

溫馨提示:CK的彩繪圓塔同城堡都有不同的開放時間,務必要上官網check下日子先再報團,唔係去到發現想參觀的冇開就慘了。官網:https://www.zamek-ceskykrumlov.eu/en

travelwebsite.com 捷克CK小鎮一日遊詳情:
https://travelwebsite.com/LocalTour/LocalTour/Details?themeId=581&rank=1&lang=zh-hk

LaLa
LaLa作者
LaLa,年齡永遠停留在20歲那年,第1次踏上飛機降落異地後,從此沈迷於旅行這玩意上。 以永遠的少女自居,相信愛旅行的人會青春不老