旅遊資訊

/旅遊資訊

首爾冰魚奇緣─冰川釣魚新體驗

Let us go~ Let us go~覺得釣魚好悶嘅朋友,有無諗過係冰天雪地之下垂釣呢?呢個咁獨特有趣嘅活動,唔使去北歐都試到㗎,因為韓國每年冬天都會有冰魚慶典,即使喺戶外凍冰冰,依然無阻當地人同遊客參與嘅興致,無論大人定小朋友,釣魚初哥定高手,小編真心推薦呢項冬天活動,就算最後釣唔到冰魚(好似小編個朋友咁……其實釣唔到仲高難度啲囉小編覺得),體驗一下都絕對值回票價呀~ 冰魚其實即係樽魚,除咗營養價值高,絕對鮮味可口﹗小編已經PLAN好今年encore多次韓國滑雪同釣冰魚㗎喇(去首爾真係有十萬個理由﹗),依家不如重溫舊年好戲先~   南怡島係小編每次去首爾必遊地點,四季景色各有迷人之處,次次去都有新驚喜,最重要係,雖然係遊客勝地,但離開碼頭位置後,依然有種寧靜嘅悠閒感覺,真係最佳休憩處。小編建議大家朝早出發,時間先可以預鬆啲,(南怡島真係一個避世好hea處嚟,大家一定要去﹗)   南怡島位於春川市,來到哩度一定要試下春川炒雞,好正㗎﹗(有辣有唔辣,嗜辣嘅小編梗係揀辣啦﹗)   朝早係南怡島hea完,又食埋lunch,就去到重頭戲─釣冰魚喇﹗   要釣大魚,梗係要有好嘅工具啦,原來冰川釣魚係用假餌,真係好神奇。但係,唔好睇啲魚竿個樣咁雞,小編見到陸續有人成功釣到魚㗎,唔知係咪啲冰水凍得滯,啲樽魚凍到鈍晒呢﹗? 提提大家,入場係會送埋魚竿,千祈唔好學小編個friend咁傻去鋪頭買,事關個冰洞咁細,好難一隻手一支魚竿咁釣㗎~   離遠睇,成班人圍埋一圈好似BBQ咁   當萬事俱備,就係時候出發去搵一個無人釣緊嘅冰洞。行喺結冰嘅湖面,感覺同去溜冰場差唔多,不過變咗係戶外,而且湖面全部都係坑,所以大家行路果陣要小心啲,如果一腳踩落去啲水度,真係會凍親,小編記得上年去果陣仲落緊雪添~揀好位置、鋪好保暖墊(其實只係一塊防水布,但好重要㗎!),就可以開始同冰魚玩遊戲喇。記得唔好就咁呆等,耐唔耐要chok 下支魚竿,等啲樽魚以為有食物游緊,咁先會上釣。   作為釣魚新手嘅小編,用咗個零鐘就釣咗兩條魚。釣到之後更可以請現場嘅工作人員幫手即席烹調,係冰川上面即釣即食,陣陣炭火烤魚香氣傳過來,加埋天氣咁凍,真係令人食指大動﹗   如果真係釣唔到,都唔緊要﹗因為現場有得賣,魚生或者烤魚都有﹗     感受完釣冰魚嘅樂趣之後,小編同朋友仲去咗雪兜場玩添~呢個亦係韓國人成日玩嘅冬日娛樂節目,大人細路都啱玩。 坐自動電梯上到雪兜場頂部,會有職員簡單介紹須知事項,然係就可以係高高嘅斜波瀡落去,頭一轉仲有少少驚,但之後就覺得好鬼正,絕對會令人樂而忘返﹗   想即刻報名去韓國釣冰魚,小編畀埋傳送門大家︰ http://bit.ly/2poUv18  

By | 九月 20th, 2018|旅遊資訊, 韓國|0 Comments

1.8km瀡落山─首爾最長斜波滑車究竟有幾正?

告別炎夏,有咩爽得過同秋風玩遊戲呢? 就係置身大自然入面同秋風玩遊戲囉﹗ 韓國近年大熱嘅斜波滑車愈開愈多,想知邊條滑道最正? 仁川江華島今年六月開咗新滑道場,最最最長滑道可以瀡足1.8公里,1.8公里係咩概念呢?未試過嘅朋友的確好難想像,等小編用數字答大家~ 根據小學教嘅數學,時間等於距離除速率,但斜波滑車嘅快慢係可以自由控制㗎嘛,即係你想瀡一聲落咗山,定係瀡足一日,都係自己揀。最過癮係一張券可以玩足3次,即係等於一日瀡足(1.8km x 3 )5.4公里,即係13.5個標準運動場嘅長度,即係坐的士的話就要畀HKD$52.9,即係喺太空館行去深水埗黃金電腦商場咁遠再遠啲,即係……唔好問小編條數點計出來,總之無錯﹗唔信嘅話,一於趁住秋高氣爽嘅天氣去瀡一瀡。 江華島滑道位於首爾近郊,係一個充滿歷史文化氣息嘅地方,島上面嘅支石墓仲被納入為世界文化遺產。但對小編來講,迷人嘅島嶼風光已經值回票價。 想玩斜波滑車,要坐纜車上去先,沿途已經可以飽覧江華島全景咁滯,加埋怡人嘅天氣,心情一定會好好。 一個人瀡又點會夠成班friend瀡咁開心吖﹗仲可以鬥快落山添~ 上咗滑車之後,操作真係非常簡單,將手桿推前或拉後,就可以加速前進或者減慢暫停,小朋友都可以自己揸一架車。 既然可以玩3次,好多人會試下高速瀡落山,體驗一下飄移嘅刺激感,加上成條滑道嘅設計有唔少彎位同急斜,好多人玩到尖叫。   雖然只係齋坐就咁瀡落去,但玩完3次都要補充體力㗎。小編大力推薦島上傳統市場─江華風物市場﹗同市區多人去嘅廣藏市場一樣,呢度都揾到生魚片或者傳統韓食,比較出名嘅有海鮮刀削麵,湯頭好鮮甜㗎。 食飽飽,好多遊客會去埋富平地下街shopping,話晒呢度係南韓最大嘅地下街,唔買嘢都要去行下望下啦。   小編明白有片有真相,睇下呢條片就知瀡得幾過癮﹗ https://www.facebook.com/ganghwaresortluge/videos/171108406786953/  

By | 九月 3rd, 2018|旅遊資訊, 韓國|0 Comments

travelwebsite.com 韓食指南(2)-馬場洞老實韓牛店

第一集travelwebsite.com 韓食指南就講起韓牛,大家好多有興趣 正常嘅,無食過韓牛,又點算去過韓國呢! 不過總有朋友覺得食韓牛點都要去翻一次馬場洞 咁啱我地第二集就係介紹馬場洞!

By | 十一月 17th, 2017|旅遊資訊|0 Comments

travelwebsite.com 韓食指南(1)-弘大韓牛烤肉店好推介

去韓國旅行,食韓牛又點少得呢? travelwebsite.com 介紹一間位於弘大嘅烤肉店 哩間係為我地 【travelwebsite.com 韓食指南】第一間介紹嘅餐廳,絕對唔會差 而且我地同店家無利益關系,所以絕對係公平公正 最緊要以上餐廳我地都有親身試過,試完之後,我地認為好食嘅話,我地就會問店主可唔可以係店鋪當眼處貼上travelwebsite.com嘅Logo 希望你地行過見到我地logo就會行入去試下啦!

By | 十一月 14th, 2017|旅遊資訊, 韓國|0 Comments

海賊王粉絲必去!

講起日本嘅主題樂園,大家一定第一時間諗起東京迪士尼同大阪環球影城! 其實除左上述嘅樂園外,日本仲有好多好玩嘅主題樂園!今次同大家介紹其中一個,就係Lagunasia拉格娜登堡,鍾意海賊王One Piece嘅粉絲一定要去潮聖!跟住海賊兵團一出發,玩到樂以忘返啦! Lagunasia拉格娜登堡位於名古屋愛知縣,樂園以海洋為主題,有二十幾種遊樂設施,例如VR過山車、360度3D影院、急流小船同摩天輪等,一定夠你玩足一日啊! 樂園仲對住個無敵大海景,真係相當浪漫啊! 7至9月仲會開放水上樂園,有六種唔同嘅泳池,好似人造浪池、泡泡池同漂流河等,啱晒一家大細玩! 雖然樂園入面樣樣設施都好好玩咁,但要數到最吸引嘅遊樂設施一定喺烈陽號! 烈陽號巨型獅子造型嘅船頭,草皮做成嘅甲板,像真度極高,就好似置身喺動畫入面咁!真係忍唔住大叫一聲「我要為海賊王!」 烈陽號大約1至2小時就有一班,全程約30至40分鐘,要留意一定要喺出航前20分鐘抵達碼頭,唔係就miss左冇得上船! 難得上到烈陽號,一定要瘋狂影相打卡!船上有多個打卡位,海賊王一眾角色人物分散喺船上每個角落,真係由上船影到落船啊! 落左船仲可以喺隔離嘅有慶典市場行下,仲有部分海賊王商品係呢到限定發售!粉絲們一定要把握機會買齊各種心頭好啦!   覺得一日玩唔晒仲可以入住樂園開嘅奇怪酒店! 奇怪酒店到底有幾奇怪?佢喺世界上第一間以機械人工作嘅酒店! 酒店使用人工智能,一入到酒店唔係人同你check in,而係有恐龍幫你check in,用聲音同touch screen就可以輕鬆check in! 行李員機械人會將行李送去你間房,真係好先進!就連房間入面都有機械人解答你嘅問題!真係好奇怪啊!

By | 九月 30th, 2017|旅遊資訊, 日本|0 Comments

新沙洞必去4大心水推介

去首爾行街,唔少人首選都係明洞或者弘大 如果嫌明洞或者弘大太多人,咁就一定要去新沙洞林蔭大道到慢慢行! 新沙洞位於江南區,呢到一帶都係以中價時裝店為主,所以賣嘅衫都有番咁上下質素而且冇咁容易同人撞款! 今次小編就同大家分享幾間新沙洞必去嘅心水推介,一齊去買新衫啦!   Indibrand 如果有上網買開韓國時裝嘅朋友都可能聽過Indibrand呢個牌子 本身係一間有頗有名氣嘅網店,近呢幾年仲開埋實體店,單係新沙洞已經有三間分店! Indibrand主打簡約休閒風格女裝,陳列以顏色分類,擺放得十分整齊,而且空間非常寬敞,所以可以慢慢試真邊件衫最啱自己! 除左女裝,店舖入面仲有飾物配件、手袋同童裝買,女士們真係要帶夠錢先好去行啊!   地址:【首爾市江南區狎鷗亭路14街22】   Around the Corner Around the Corner係由LG Fashion 開設嘅生活概念店 店舖外型獨特有型,離遠已經一眼睇到,就算係路過都會畀佢吸引住! 店入面搜羅左世界各地同韓國本土有趣嘅設計服飾,單係韓國本地牌子都有成50幾個,連歐美潮牌都可以係呢到搵到,服飾都係充滿玩味,而且有齊最新男裝女裝,所以深受韓國年輕人歡迎! 除左服飾,Around the corner仲有好多個性化生活用品買,無論係男士定女士,係呢到都可以搵到心頭好!   地址:【首爾市江南區狎鷗亭路12街24】   Jaju 如果閣下平日好中意行家品店,咁就一定要嚟有韓版無印良品之稱嘅Jaju Jaju主打清新簡約,店面設計以大自然木材做主題,一入到去就覺得好舒服放鬆! 而新沙洞旗艦店樓高四層,由生活雜貨、廚具、服飾、零食至到嬰兒用品都有得買,最重要係價錢比無印平啊,家品控今次要敗家啦! 旗艦店仲設有cafe,行到攰可以去食個意粉西餐充電再戰鬥過!   地址:【首爾市江南區島山大路13街15】   醬油蟹美食街   新沙洞除左有靚衫買,原來仲有一條醬油蟹美食街! 全條街都係食醬油蟹嘅舖頭,而且好多都係開二十四小時,瘋狂購物完再去食蟹補充體力都冇問題! 咁多間醬油蟹店點好啊?今次同大家介紹一間比較有名氣嘅醬油蟹店,叫馬山 辣炖鮟鱇魚店(마산 아구찜),質素一定有番咁上下! 呢到嘅醬油蟹(간장게장)分左兩個size,細size有兩隻蟹,如果兩個人去食就啱啱好! 醬油蟹嘅靈魂一定係個醬油,因此製作調味醬油嘅材料份量十分講究,鹽同糖嘅比例都要十分準確,先可以保持到蟹嘅鮮味! 最正嘅食法就係將一匙羹醬油倒落熱辣辣嘅白飯,連同黃金色嘅蟹膏撈埋一齊,真係一流啊! 除左醬油蟹,韓國本地人仲會食以辣椒粉浸泡嘅辣醬蟹(양념게장)!大家下次去都可以挑戰下!   地址: 【首爾市瑞草區蠶院洞21-1, 新沙站4號出口】

By | 九月 27th, 2017|懶人包, 旅遊資訊, 韓國|0 Comments

極光攻略六:新西蘭✕澳洲

講起極光,唔少人都會立即諗起北歐、加拿大同阿拉斯加等北半球地區,其實南半球都有睇極光架! 綠色嘅極光見就見得多,有冇諗過睇粉紅色嘅極光呢?去南半球就可以一完你尋找粉紅極光嘅少女心! 可能你會問點解南極光會喺紅紅橙橙而唔喺好似北極光咁綠色? 咁喺因為唔同高度嘅大氣層會反射唔同顏色嘅極光,而粉紅色極光就喺位於較高空80-100公里之間,當氮分子受到一個高能量電子撞擊所產生 粉紅色極光只有喺太陽活動強烈嘅情況下先睇到,所以比起綠色嘅極光更為罕見 除左粉紅色,紫色、綠色、黃色同藍色極光都會出現喺南半球嘅天空上 Kp代表極光可見範圍覆蓋率,當Kp值達到4-5,睇到南極光嘅機率就更高   只要位於南緯度67度附近嘅兩個環帶狀區域入面都有機會睇到南極光 而新西蘭同澳洲南部都位於環帶狀區域入面,喺欣賞南極光嘅好地方 每年四月至九月都喺南極光出沒嘅季節,南半球正值秋冬,日短晚長就最適合睇極光 新西蘭嘅蒂卡波湖同澳洲嘅塔斯曼尼亞都喺南半球賞光嘅好地方   新西蘭南島嘅蒂卡波湖(Lake Tekapo)位於庫克山盆地,喺一個遠離凡塵嘅地方 蒂卡波湖睛天比率高同光害少,因此被評為地球上最佳觀星場所 除左星空,仲可以欣賞埋蒂卡波嘅極光,真喺嘆為觀止啊!   被人稱為世界的盡頭嘅塔斯曼尼亞位於澳洲最南端,喺澳洲最接近南極圈嘅地方 由於緯度高,塔斯曼尼亞嘅黑夜十分漫長,遇到極光嘅機率就更高 同時係全澳洲空氣最清新嘅地方,空氣中雜質好少,顯得天空更加清,極光都更震撼! 如果話北極光偏綠感覺冷冰冰,咁南極光偏粉紅同橙感覺就更溫暖,而且南極光比起北極光更罕見同浪漫,絕對喺人生必定要睇嘅幸福~

By | 九月 5th, 2017|出走遊記, 大洋洲, 旅遊資訊, 極光|0 Comments